Saturday, December 19, 2015

අමතකව



එක්තරා සමයක
සඳටත් හොරෙන්
සඳ එලියෙන්ම
කුමන්ත්‍රණ කරපු උන්
සඳට යලි නොඑන්නම
අමාවක ගෙන ආහ

අලුත් ඉරක් ගැන
වගක් නොවූ උන්
අව් කන්නාඩි පැළඳ
අමුතු අඳුරකට
පෙම් බැන්දහ

උන්ට සරා සඳක
සොමි පහසද
අරුණෝදයක
මන්ද රස්මියද
අමතකව තිබුණහ

අඳුරේම උන්නු උන්
කණාමැදිරි පුකක් වන්
එක රැයෙන් දිලී පරවන
තාරුකා එලි දෙසම
නෙත් යොමන්
උඩ බලන්
ඉන්නට ගත්තහ.

තරුද තෙමේගේම
ඌස්නය දරා ගත නොහී
රාප්ත තප්තව
දිලෙන්නට වන් කල
එතරු කඩා
බිම හෙළ මැයි සිතා
ගල්ද බොරළුද
දෝතින්ම ගෙන
හිස් අහසට
ඔහේ දමා ගැසූහ

උන්ට තරු කැට අභිමුව
දෝතට ගත්
ගල් කැටයක
සුමට රවුම් බවද
විටෙක කඩතොළු රළු බවද
අමතකව තිබුණහ.

උන් තුගු රුකින් හෙබි
අරණට ගිනි වැද
කල් යල්ද නොබලා
මෙගා හේන් කොටන්නට
වන් කල
වැසි දියක් නොලද්දෙන්
කාබන් වායුන්
වලාවලට ඉස ඉස
කෘතීම වැසි මැවූහ

රාත්‍රියේ ඇද හැලෙන
පිනි වැස්ස
උන්ට
අමතකව තිබුණහ

එකල්හි උඩ යැවු ගල්
හිස මත්තෙහි වැටී
වේදනාවෙන් බරිතව
ගලට වෙර බැන්දහ

නමුත් හිසක් ඇති බැව් ද
උන්ට අමතකවම
තිබුණහ.

Sunday, November 8, 2015

පිඟන් තටු අතර (අපේ එකෙකු ගැන)




උඹේ හීල්ලුම් හා එක්ව උඩු හුළඟින්
දිවි ගමනේ පැතුම් කන්දට උඩහින්
නැග එන බර සිහින වලාවන්
නිදි නොලැබම උඹ දැක්කෙන්
ගිලා බැහැලනෙ නුඹේ දෙනුවන්

අම්මේ උඹත් දැන් දැන්
වයසට ගිහිල්ලනේ බන්
මන් ලොකුවෙලාද මන්දා බන්

නුඹේ සුලැඟිල්ලෙ එල්ලෙමින්
කුලියක් හොයා හොයා යන ගමන්
උඹගෙ පස්සෙන්ම වැටෙමින්
ගිය ඒ සොඳුරු මතකයන්
අද ඊයෙම වගෙයිනෙ බන්

මං දකින සිහිනයන්
නොවිමසා මගේ මුවින්
හැබෑවක් වනු නියෙන්
විකටර් මුදලාලිගෙන්
සීයට දහයේ ගිනි පොලියෙන්
සින්න කරන් උඹෙ කඩුක්කන්
කාසි ගෙනත් තියා මගේ දෑතින්

කොළඹ රටට එනු රිසියෙන්
නුඹේ දෙපා වැඳි මොහොතින්
හඬන්න කඳුලක් නැතියෙන්
නෙත් කෙවෙනිය තෙත් නොකලෙන්
පපු පොඩිත්ත හැඬු කඳුලෙන්
සිතුවම් වූ දරු සෙනෙහින්
නුඹේ මුහුණම එලිය වුයෙන්
වෙව්ලන ඒ මහ දෑතින්
හිස අතගා නුඹේ මුවින්
බුදු සරණයි කිව් හැටියෙන්
කොළඹ ආවේ මං සතුටින්

ජීවිතයට නව රසය සොයන්
කොළඹ රටට ආපු ගමන්
සුදු පාටට ඒ ඔපයෙන්
කණ වැටුනිය මගේ දෙනුවන්
සැහැල්ලු මුත් පිහාටු වන්
උර රිදෙන්නේ හරි බරකින්
හෝටලේක වලන් පිඟන්
ජීවිතේම සින්න කරන්

හිමිදිරියේම උදැහින්
වෙල් දෙණිවල ඇවිද ගොසින්
කොස් ගෙඩියෙන් පොලොස් ගැටෙන්
අඳ කුඹුරක උප්පිඩකින්
පොල් කොළයෙන් පිසූ බතින්
කොහොල්ලැ ගුලි ලාකඩයෙන්
පිරියම් නම් කැටයමකින්
හැඩ වැඩ කල පිඟන් වලින්
කුසගින්නේ හිඳ අනමින්
හරි රවුමට කටින් දෙකින්
ජීවිතයේ අම රසයන්
දිවග මතින් තැබුවේ තුටින්

මෙහි නිතර යනෙන උන්
කළු කබා මහත්තුරුන්
නෝනලා තොරන් වන්
ඇනවුම් කොට උඩඟුවෙන්
කති මාන්නය වමාරමින්
මධු විතට මුසු කරන්
ප්‍රීතියේ බිඳක් තොල ගාමින්
පාකරයි රාග දුම් වලාවන්
උන්ගේ තොසේ සොච්චමින්
සිත ගෙන යමි මතක මතින්

අප්පච්චිත් හිටිය නන්,
ඉර බහිනා කල වෙහෙසින්
රා කට්ටෙන් මඤ්ඤොක්කෙන්
හේනේ ඉඳන් පැල් රකිමින්
තාලෙට කී සී පදයන්
ප්‍රතිරාව නගයි තුල දෙසවන්

ඉතිරි වූ පිඟන් රස මසවුලින්
අහක දමනා කල දුකින්
වැසී යයි දෙනෙත් ඒ සිතුවමින්
බඩගිනි කාලකන්නීන්
වීදුරු ජනේලයට පිටින්
අප දෙසටම නෙත් යොමන්
කුස අතගාන හැටි හාමතින්

හෙළුවැල්ලම ඇඟ ලා ගත් ගතින්
ලස්සන පොඩි ගැටිස්සියන්
නාඹර කොළු ගැටව් සමගින්
මත්ව ආලයේ කාම මුලාවෙන්
තොල ගාන්න මධු රසයන්
මෙහි පැමිණෙත් මා පුදුම කරන්

අම්මේ මට මතකයි බන්
ලොකු නංගිත් ගෙටම වන්
දිනක නුඹ නෑඳ හංගන්
උන්නු හොඳ චීත්තයන්
ගවුම් කරලා උඹේ දෑතින්
ඇගෙ සියොළඟ කළා වසන්
වටේ තිබුණු රාග නෙතින්

සොඳුරුම රහස විශ්වයෙන්
මෙහි ඇත නොරහසක් වන්
ඈත රටවල පිපෙන කුසුමන්
මිලාන වෙති මත්තෙහි සයනයන්
මලින් ගලා ගිය රතුම කඳුලින්
ඇතිරිල්ල මත වේය සටහන්
උදුරා ගත් උන් සුවඳ ශේෂයන්
මුසුව හෙලූ හුස්ම සමගින්
බමයි පන්කාවෙන් නැගුනු සුළගින්

සමුදී එන විට නුඹට හොරෙන්
හංගා ගෙනා රෙදිමල්ලෙන්
දුම් රොටු හා නුඹේ සුවදින්
සිතුවම් ඇඳි දැලි දුහුලින් 
හිරු සැඟවුණු අවසරයෙන්
අපට රැයක් උදා කළෙන්
එලා ලෑලි ඇඳ මත්තෙන්
දැනෙනා විට ඒ උණුසුමෙන්
සැනසෙමි නුඹේ චීත්තයෙන්


පසු විපරම 

යහළුවෙකුගේ උපන්දින සමරුමක මාන්නය වළඳා ප්‍රීතිය තොලගාන්නට නීරස ආහාර පානාදියෙන් පිරි හොටෙල් ගුබ්බෑයමකට රිංගූ සැඳෑවක දුර පලාතක වන් පෙනුමැති නුහුරු ගැටයෙක් වන් වේටර් කොලුවෙකුගේ අතින් කුමක් හෝ යමක් බිඳී ගියෙන් පාලක තැන විය හැකි අයෙක් කොලුවාට බැන වැදුණු අයුරුත් පසුව වොෂ් රූම් එකේදී හැඬූ කඳුලින් යුතුව මවට දුරකතනයෙන් කතාකරමින් සිටි ඔහුව යලිත් දිටිමි. මේ සියල්ල සමගින් එතනින් නික්ම මුහුදු වෙරළකට ගොස් බැස යන හිරුත් සමග ගී ගයමින් ප්‍රීතී වුනෙමි. අයෙකු ප්‍රීති වද්දී තවත් අයෙකුට ශෝකය ගෙන දෙන අරුමැසි ලොවක අයෙකුගේ දුක විකුණන තවත් එක් ආත්මාර්තකාමියෙකු ලෙසින් මේ සටහන ඔහු වෙනුවෙන් තබමි. 

Saturday, October 31, 2015

මල් වඩමකින් නුඹේ තනිය නිවේදෝ



හැව්ලොක් සිටිය වාගේ උසටම
හීන කන්දක් සුමනා දැක්කා
වත්තෙ මුඩුක්කුවෙ ලෑලි පෙට්ටියේ
ගැහෙන ජීවිත ඒවා අතරේ රැඳී තිබුනා
හිසට ඉහලින් උන්නු තහඩු කොළ
මලකඩෙන් බැට කාලා තිබුනා
අම්මත් මරන් උපන් එකී ලෙස
වත්තේ ඈටත් නමක් තිබුනා

මන්ද මානසික සටන පැරදී
අයියා වකුටුව වැටී හිටියා
ජීවිතේ දුක නොදැනම වෙන්නැති
උගේ මුහුණේ නිති හිනාම පිපුනා
කාසේ රෝගෙට උඩටම අදිමින්
ආච්චිත් රෑ තිස්පැය ගෙව්වා
සුමනා ගැන හිතිලා වෙන්නැති
පපුවත් ඇගෙ ගොර හඬකින් හැඬුවා

ඇඟේ මසටත් මිලක් ඇතිබැව්
අම්බපාලිත් දැනන් උන්නා
ඒවගක් දැනගත් දිනක ඉඳලා
සුමනටත් අඹවන ඇරී තිබුනා
සිටු ඇමතිවර නාදුනන හඬවල්
දුරකතනයකින් ඈ හා කතා කෙරුවා
මොහොතට සුවදෙන චංචල රසයේත්
මිල ගණන් උන් හෙට්ටුම කෙරුවා

සඳක් නොමැති රෑ තනිය මකන්නට
සුමනාට බොහෝ උන් නිතරම හිටියා
තරු එළියක් වත් උන්ලග තිබුනද
ඈ හට පොඩියට සැකයක් හිතුනා
වෙඩිමක් නැතිවට දීගෙක යන්නට
සුමනට හිත් කොන අසා තිබුනා
දීගෙක නොගියත් අතිනත යන්නට
සුමනගේ දයිවය කියලා තිබුනා

ඈටත් ඇගෙ හිමි සඳකට තුරුලුව
මධු රස විදින්නට අසා තිබුනා
හිමි සඳ නැතුවට මධු රස බොන්නට
මත් බඹරුන් බෝ පියඹා ආවා
පන්සලේ බෝ ගසේ නොමැති සිසිලක්
වීදි පහන් යට සුමනාට දැනුනා
පෙරුමන් අතරේ සියුමැලි පැතුමක්
ඇගේ කුස තුල මෝරා තිබුනා

අනාරාධිතවම ඇයගේ කුස තුල
කව්දෝ පිළිසිඳ ගෙන තිබුනා
මිලාන වී ගිය සුමනාගේ ලෝකෙට
ජීවය ගෙනවිත් දීල තිබුනා
මෝරන කුස අතගාගා හිඳ 
සුමනා දරු නැළවිලි ගී කිව්වා
අනාරාධිතවම ආපු කුසුම දිනයක
සුමනට නොකියම ගිහිල්ල තිබුනා

කුසයට ආ කුසුම පරවගොස්
දුකටම සුමනා කෘෂ වනවා
සිටු ඇමතිවර රැවටුන රූපය
ටික ටික වැහැරී කුණු වනවා
මල් කළඹක් නොමැතිව දීග නොගිය ඈ
සුදු සාරියකින් හැඩ වනවා
ඈව කැපූ මොචරියේ කොලුවත්
ඇයගේ තනියට ඈ හා බුදියනවා
මල් කළඹක් අගේ දෑතේ නොතිබුණද
මල් වඩමක් ඈ වල ළඟ තිබුනා 

Wednesday, October 28, 2015

අයිස් ක්‍රීම්



ලපටි සිත් මත
විනොදාස්වාදයේ
සතුට දනවන
මිහිරි රසයන්ගෙන්
දිවග කලතන
අරුමෝසම් සිහිනයන්හි
නේක වර්ණයන්
නෙතග දල්වන
උදා හිරු කිරණට
මොහොතකට පෙර
හීතලට
ලපටි දෑතක් මත
මිදුණු පිනි බිඳුව

පෙම්වත් දැහැන් මත්තට
ආලයේ සුවය ගෙන එන
පෙම්වතියක් වෙනුවෙන්
පෙම්වතෙකු පුදදෙන
ප්‍රේමයේ සීතලින්
මිදී සැමදා ඉන්නට තතනන
නුමුදු
ගිනිගහන දහවලේ
උණුසුමත් පරයා නැගෙන
නුරාවේ ගින්නෙන්
දෑත් මත්තෙම දියව යන
ඉමිහිරිම මධු බිඳුව

වියපත් දනන් හට
ලෝකයම මුලා කර
කාලය දුවන බව
පසක් කර දී
ගෙවුණු අතීතයේ
මිහිරි සේම අමිහිරිද වූ
මතකයන් එකින් එක
ගෙනහැර මවා පා දෙමින්
බැසයන හිරුගෙ තනියට
මහලු දෑසකින්
මහත් ස්නේහයෙන්
කොපුල මත්තෙන්
ගලා ගිය
කඳුළු බිඳුව
Related Posts Plugin for WordPress, Blogger...